सर्लाही – भारतीय सीमावर्ती बजार बसभिट्टा नाका छेउ नेपालतर्फको श्रीकट्टा देवीको मन्दिर छेउबाट बलरा बजार हुँदै गडहियासम्म जोड्ने कालोपत्रे सडकको उद्घाटन गरिएको छ ।

वीरगंज स्थित नेपालका लागि भारतीय महावाणिज्य दुतावासका महावाणिज्य दुत नितिश कुमार र क्षेत्र नं. ४ बाट निर्वाचित विघटित संघीय सांसद् डा. अमरेश कुमार सिंहले संयुक्त रुपमा शुक्रबार दिउँसो उद्घाटन गरेका हुन् । श्रीकट्टा देवीको मन्दिर नजिक ३३९÷२ सीमा पिलर छेउमा बनाईएको स्तम्भको पर्दा उघारेर तथा रिवन काटेर कालोपत्रे सडकको उद्घाटन गरिएको हो । उद्घाटन कार्यक्रममा विभिन्न राजनैतिक दलका नेताहरु लगायत स्थानीय सुरक्षा अधिकारीहरु, स्थानीयबासी लगायतको उपस्थिती रहेको थियो ।

भारत सरकारको आर्थिक सहयोगमा डिभिजन सडक कार्यालय चन्द्रनिगाहपुरले आव्ह्वान गरेको टेण्डर अनुसार ६ किलोमिटर सडकखण्ड कालोपत्रे सम्पन्न भएको हो । सडकमा ह्यूमपाईप हाल्ने र कल्भर्ट निर्माणको समेत काम भएको बताईएको छ ।

दुईवटा प्याकेज अन्तर्गतको कालोपत्रेको काममा पहिलो प्याकेजको रोशन कन्ट्रक्शन कम्पनी लिमिटेड जनकपुरले मुल्य अभिवृद्धि कर सहित तीनकरोड एकलाख १५ हजार ८७० रुपैंया १९ पैसा तथा दोस्रो प्याकेजको विवेक निर्माण सेवा सर्लाहीले मुल्य अभिवृद्धि कर सहित एककरोड २३ लाख ६२ हजार ४८८ रुपैंया ९१ पैसा टेण्डर सकारेर निर्माण सम्पन्न गरेको हो ।