काठमाडौँ — अभिनेत्री सुष्मा कार्कीले आफूलाई हातपात गरेको भन्दै आरती खड्का विरुद्ध महानगरीय प्रहरी वृत दरबारमार्गमा उजुरी दिएकी छिन् ।
सोमबार काठमाडौंको लन्डन पबमा हातपात भएपछि राति नै प्रहरीमा उजुरी दिएको उनले बताइन् । ‘उत्सव रसाइलीसँग अन्तर्वार्ताको विषयमा भनाभन भयो । त्यही बेला २ जना केटाहरु आएर मलाई अपशब्द प्रयोग गरे । त्यसपछि श्वेता खड्काकी बहिनी आरतीले पछाडिबाट कपाल लुछिन् । मसँग फुटेज छ,’ उनले भनिन् ।
पबमा अभिनेत्री श्वेता खड्का, उनका पति विजयेन्द्रसिंह राउत र बहिनी आरती खड्का उपस्थित थिए । प्रहरीमा उजुरी दिन पबबाट निस्कँदा श्वेताले पनि आफूविरुद्ध अपशब्द प्रयोग गरेको कार्की बताउँछिन् ।
सोमबार राति नै हातपात गरेको भन्दै कार्कीले निवेदन दिएको महानगरीय प्रहरी वृत दरबारमार्गका डिएसपी रामेश्वर पौडेलले बताए । ‘आरती खड्कासँग उहाँको सामान्य विवाद भएको रहेछ । उहाँले उजुरी दिनुभएको छ । उजुरीमा सामान्य हातपात भएको उल्लेख गर्नु भएको छ,’ उनले भने, ‘हामीले दुई पक्षलाई छलफलका लागि बोलाएका छौं ।’
