धनुषा- संसद विघटनको विरोधमा प्रमुख विपक्षी नेपाली कांग्रेसले धनुषा सहित देशभर विरोध प्रदर्शन गरेको छ । पूर्वनिर्धारित कार्यक्रमअनुसार देशभरका १६५ वटै निर्वाचन क्षेत्रमा आज काँग्रेसले प्रदर्शन गरेको छ ।
प्रधानमन्त्री केपी ओलीले गरेको संसद् विघटन असंवैधानिक र अलोकतान्त्रिक कदम भएको भन्दै कांग्रेसले चारवटै निर्वाचन क्षेत्रमा विरोध प्रदर्शन गरेको हो ।
सोमबार दिउँसो १२ बजे विरोध प्रदर्शनमा सहभागीहरूले प्रधानमन्त्री केपी ओली मुर्दावाद, बलात्कारी सरकार मुर्दावाद, संसद् विघटन गर्न पाइँदैन, लोकतन्त्र विरोधी प्रधानमन्त्री मुर्दावाद लगायतका नारा लगाएका थिए ।
कांग्रेसको केन्द्रीय निर्देशनअनुसार जिल्लाको प्रत्येक संघीय निर्वाचन क्षेत्रमा विरोध र्याली र सभा भएको धनुषा कांग्रेसका सभापति महेशशंकर गिरिले जानकारी दिए ।
धनुषा क्षेत्र नम्बर १ धनुषाधाममा कांग्रेसका केन्द्रीय नेता तथा पूर्वमन्त्री समेत रहेका आनन्द ढुंगाना, क्षेत्र नम्बर २ को यदुकुहामा केन्द्रीय नेता तथा पूर्वमन्त्री रामकृष्ण यादव, धनुषाको क्षेत्र नम्बर ३ को नगराईनमा प्रदेश नम्बर २ का संसदीय दलका नेता रामसरोज यादव र क्षेत्र नम्बर ४ को महेन्द्रनगरमा केन्द्रीय नेता तथा पूर्वमन्त्री महेन्द्र यादवको नेतृत्वमा विरोध प्रदर्शन गरिएको छ।
धनुषा क्षेत्र नं. १ धनुषाधाममा आनन्द ढुंगानाले संघीयता समाप्त गर्नकै लागि संसद विघटन गरेको आरोप लगाए।
धनुषा क्षेत्र नम्बर २ यदुकुहामा कोणसभामा बोल्दै नेता रामकृष्ण यादवले संविधानको रक्षा गर्नुको साटो उल्टै संसद विघटन गरेर कम्युनिष्टको सरकारले संविधान विरोधी क्रियाकलाप गरेको आरोप लगाए।
‘संविधानमा जुन कमीकमजोरी थियो त्यसलाई सच्याउने समय थियो तर ओली नेतृत्वको सरकारले संसद विघटन गरेर संविधानको लागि बलिदानी दिएका सहिदहरूको सपनालाई तोडेको हो,’ उनले भने।
क्षेत्र नम्बर ३ को कोणसभालाई सम्बोधन गर्दै प्रदेश २ का संसदीय दलका नेता रामसरोज यादवले यो सरकार जति भ्रष्ट संसारकै कुनै सरकार नरहेको आरोप लगाए।
त्यसैगरी क्षेत्र नम्बर ४ को कोणसभालाई सम्बोधन गर्दै पूर्वमन्त्री तथा केन्द्रिय सदस्य महेन्द्र यादवले भने, ‘संविधानको रक्षक नै भक्षक भएपछि संविधानलाई बचाउन असम्भव रहेको छ,’ उनले भने, ‘राष्ट्रपतिसँग विभिन्न सल्लाहकारहरू छन्। कम्तिमा कानूनी सल्लाहकाहरूसँग सल्लाह लिनुपर्ने थियो तर सिफारिस जाने बित्तिकै सदर गर्नुभो।’
विरोध सभालाई सम्बोधन गर्दै नेताहरूले प्रधानमन्त्री केपी ओलीले संसद्लाई विघटन गरेर लोकतन्त्रको धज्जी उडाएको र लोकतन्त्र विरोधी नेताको रूपमा प्रस्तुत भएको बताएका छन् ।
उनीहरूले प्रधानमन्त्रीले हैकमवादी शैलीमा लोकतन्त्रमाथि हमला गरेको र यो नेपाली जनताले स्वीकार नगर्ने चेतावनी दिएका छन्।
गत पुस ५ मा प्रधानमन्त्री केपी ओलीले संसद् विघटनको प्रस्ताव गरेपछि त्यही दिन राष्ट्रपति विद्यादेवी भण्डारीले संसद् विघटन गरेकी थिइन् ।
सोही दिनदेखि देशभर विभिन्न राजनीतिक दलले देशव्यापी प्रदर्शन गर्दै आएका छन् ।
