जनकपुर- जनकपुरधामस्थित गोरधोई पोखरीमा आज (शनिबार) बिहान मृत अवस्थामा एक युवकको शव फेला परेको छ ।
जनकपुरधाम उपमहानगरपालिका वडा न.९ पीडारीचोकमा रहेको गोरधई पोखरीमा मृत अवस्थामा एक युवकको शव भेटिएको हो ।
आज बिहान बिहानै स्थानियले ति युवकको शव गोरधोई पोखरीको दक्षीण तर्फ रेल्वे लाईनको बिचमा पोखरी किनारमा तैरिरहेको अबस्थामा देखेपछि प्रहरीलाई खबर गरेका थिए ।
मृतक सर्लाही घर भई हाल जनकपुर-९ संकटमोचन मन्दिर छेउमा डेरा गरि बस्ने अन्दाजी २२ वर्षीय युवक अविनाश कर्ण रहेको जिल्ला प्रहरी कार्यालय धनुषाले जनाएको छ ।
मृतक युवकको केहि महिनादेखि मानसिक सन्तुलन बिग्रेको र उपचार समेत भईरहेको बताइएको छ । जिल्ला प्रहरी कार्यालय धनुषाका प्रहरी उपरिक्षक रमेश कुमार बस्नेतका अनुसार मृतकका आफन्त सम्पर्कमा आईसकेको बताए । आज बिहान साढ़े ६ बजे प्रहरीले जानकारी पाउना साथ घटनास्थल पुगेको थियो ।
मृतक युवक जनकपुरको एक विद्यालयमा अध्यापन पेशा गर्दै आएका थिए । मानसिक सन्तुलन खराब रहेका उक्त युवकलाई घरमै केहि दिनदेखि बाँधेर राखिएको थियो । तीन दिन पहिले ति युवक घरबाट भागेको परिवारलाई उद्धृत गर्दै धनुषा प्रहरीले जानकारी दिएको छ ।
मृतक युवकका पिता प्रहरीको सम्पर्कमा आइसकेको र कानून अनुसार मुचुल्का उठाई शव परिबारलाई बुझाइएको धनुषा प्रहरीले जनाएको छ ।
