काठमाडौं – सत्तारुढ नेकपामा विवाद मत्थर भएसँगै प्रधानमन्त्री केपी ओलीले मन्त्रिपरिषद् पुनर्गठनको तयारी थालेका छन् । पार्टीका अर्का अध्यक्ष पुष्पकमल दाहाल प्रचण्डको सहमतिमा प्रधानमन्त्री ओलीले मन्त्रीहरूको हेरफेरको तयारी थालेको स्रोतले बतायो ।
प्रधानमन्त्री ओलीले हालका आधा दर्जन मन्त्रीलाई हटाउने तयारी गरेका छन् । जसमा उपप्रधान एवं रक्षामन्त्री ईश्वर पोखरेल, श्रममन्त्री रामेश्वर राय यादव, वनमन्त्री शक्तिबहादुर बस्नेत, स्वास्थ्यमन्त्री भानुभक्त ढकालसमेत पर्ने बालुवाटार उच्च स्रोतले जानकारी दियो । प्रधानमन्त्री ओलीले खानेपानी मन्त्री बिना मगरलाई हटाउने मनस्थिति बनाए पनि प्रचण्डको दबाबका कारण तत्काल निर्णय नलिने भएको बुझिएको छ ।
प्रधानमन्त्री ओलीले पार्टीमा धेरै विवाद देखिएपछि दुई साताअघि नै प्रचण्डलाई आफूले भदौ १ गतेपछि मन्त्रिपरिषद् पुनर्गठन गर्ने र त्यसबेला धेरै मन्त्रीको जागिर जाने जनाउ दिएका थिए ।
स्रोतका अनुसार प्रचण्डले गृहमन्त्री रामबहादुर थापा बादललाई हटाएर जनार्दन शर्मालाई गृहमन्त्री बनाउनुपर्ने अडान लिएका छन् । तर, प्रधानमन्त्रीले बादललाई उपप्रधानमन्त्रीमा बढुवा गर्ने तयारी थालेको बुझिएको छ । उपप्रधानमन्त्री पोखरेलको ठाउँमा बादललाई ल्याउने तयारी भएको छ ।
यस्तै, नयाँ मन्त्री बन्नेमा वामदेव गौतम, तुलसा थापा, सुरेन्द्र पाण्डे, देवेन्द्र पौडेललगायतको चर्चा छ । अर्थमन्त्री डा.युवराज खतिवडा अबको २० दिनमा सांसद नबने उनको मन्त्री पदमा रहने वैधानिक हैसियत सकिनेछ । त्यसैले प्रधानमन्त्री ओलीले राष्ट्रिय सभाको एक सदस्यमा गौतमलाई मनोनीत गरेर उनलाई मन्त्री बनाउने वा उनकी श्रीमती तुलसा थापा गौतमलाई मन्त्री बनाउने भन्नेमा छलफल चलिरहेको छ ।
स्रोतका अनुसार नेकपा उपाध्यक्षसमेत रहेका गौतमले दुवै विकल्पमध्ये जुन सजिलो लाग्छ त्यही निर्णय गर्न प्रधानमन्त्री ओलीलाई छुट रहेको बताउने गरेका छन् । गौतमकै कारण यसपटक पनि आफ्नो प्रधानमन्त्रीको कुर्सी जोगिएकाले ओली उनीसँग नरम देखिएका छन् । यसपटक मन्त्री बन्ने सूचीमा झलनाथ खनाल समूहबाट एकजना नेता पर्ने बताइएको छ ।
