सिड्नी । जनसम्पर्क समिति अष्ट्रेलियाको दीर्घकालीन विवाद समाधान हुने भएको छ । लामो समयदेखि अधिवेशन नभइरहेको अवस्थामा यसपाली भने समितिले नयाँ कार्यसमिति चयनको प्रक्रिया शुरु गरेको छ ।
नेपाली कांग्रेस केन्द्रीय कार्यसमितिले दिएको निर्देशन अनुसार संयोजक कृष्ण गिरीले अष्ट्रेलियाका विभिन्न राज्यमा रहेका जनसम्पर्क समितिहरुलाई अधिवेशनका लागि संयोजक तोकेका छन् ।
बिगत छ वर्षदेखि हुन नसकेको अधिवेशन अब चाँडै हुने अष्ट्रेलियाका जनसम्पर्क समितिका संयोजक गिरीले बताए । संयोजक गिरीले भने, ‘अब हामी सबै एक भएर अगाडि बढ्नु पर्नेमा जोड दिए । सबैको एकताबाटै संस्था बलियो हुने बताउदै आगामी अधिबेसनमा सबैलाई एक हुन आग्रह गर्नुभयो ।
यता जनसम्पर्क समिति सिड्नीको संयोजककामा शितल खाँड़ गिरी उम्मेदवार बन्ने भएका छन् । नेपाली कांग्रेसमा लामो समयदेखि क्रियाशील गिरी स्याङ्जा ४ रुपाकोटका हुन् । सन् २००९ देखि अष्ट्रेलियाका युवाहरुलाई संगठित गर्दै विभिन्न सामाजिक कार्यमा पनि गिरी सक्रिय छन् । गिरीले भन्छन्, ‘ शुरूमा जेमा आस्था भयो, आज पनि त्यसमा नै छ । बिचार, सोच र धारणामा फरक आएन । जीवन आजसम्म नेपाली कांग्रेस भनेर लागियो’
गिरीलाई संयोजक तोकिएपछि सिड्नीमा रहेका युवाहरूले पनि खुसी व्यक्त गरेका छन् । गिरी गैरआवसीय नेपाली संघ अष्ट्रेलियामा पनि धेरै नजिक रहेर बिभिन्न सामाजिक कार्य गर्दै अगाडि बढेका युवा हुन् ।
यसैगरी केन्द्रीय समितिको निर्णयले अधिवेशन समितिको अन्य राज्यका संयोजकहरूमा मेलबर्न रमेश चत्कौली, पर्थ निल थपलिया, ब्रिसबेन अभिमानसिंह बस्नेत, क्यानभरा भागीरथ सापकोटा, तास्मानिया प्रमोद सापकोटा ,डार्बिन सिजन गिरी र एडिलेटका लागि दिलीप पोखरेललाई तोकेको छ ।
केन्द्रले अष्ट्रेलियाको अधिवेशन समितिको निर्वाचन अधिकृतमा गणेश केसी र सिड्नीको निर्वाचन अधिकृतमा राजु अधिकारीलाई चयन गरेको छ ।
