जनकपुर- प्रदेश २ मा राष्ट्रियसभा निर्वाचनको चार सीटको लागि मतदान हुँदैछ ।
जनकपुरधाम स्थित धनुषा जिल्ला प्रहरी कार्यालयको अगाडी पट्टी रहेको महेन्द्रनारायाण निधि सांस्कृतिक केन्द्रमा राखिएको मतदान स्थलमा बिहान १० बजेदेखि मतदान सुरु भएको मतदानमा अहिले सम्म लगभग ५० प्रतिशत मतदान भइसकेको जानकारी मतदान अधिकृत डा शम्भु साहले गराएका छन् ।उनले दिउँसो ४ बजेसम्म मतदान हुने कार्यक्रम रहेको जनाए ।
प्रदेश २ का मुख्यमन्त्री लालबाबु राउतले प्रथम मतदान गर्दै जनकपुरमा मतदान सुरु भएको हो ।
प्रदेश २ का आठवटै जिल्लाका मतदाता प्रदेश सांसद, स्थानीय पालिकाका प्रमुख तथा उपप्रमुख मतदान स्थलमा पुगेर मतदान गर्दै छन् । प्रदेश सभाका सदस्य र स्थानीय तहका मतदाताका लागि छुट्टाछुट्टै मतदानस्थलको निर्माण गरिएको छ ।
प्रदेश २ मा प्रदेश सभाका सदस्यको संख्या १०७ छ भने स्थानीय तहमा १३६ पालिकाहरुका प्रमुख तथा उपप्रमुख गरेर कूल २७२ मतदाता छन्। दुवै मतदान केन्द्रमा गरी कूल ३ सय ७९ मतदाता छन् ।
निर्वाचनलाई मध्यनजर गरि मतदान स्थलमा महेन्द्रनारायण मिथिला सांस्कृतिक भवन क्षेत्रमा सुरक्षा व्यवस्था कडा बनाइएको छ ।
प्रदेश २ का राष्ट्रियसभा निर्वाचन कार्यालयका अधिकृत राजुकुमार खतिवडाले मतदान सम्पन्न भएपछि सर्वदलीय सहमतिका आधारमा आज बेलुकादेखि नै मतगणना गर्ने कार्यक्रम रहेको जनाएको छ ।
प्रदेश २ मा राष्ट्रिय सभाको चार सदस्यका लागि भइरहेको निर्वाचनमा ८ जनाले उम्मेदवारी दिएका छन् । निर्वाचनमा नेकपासँग राजपा र काँग्रेससँग समाजवादीले छुट्टाछुट्टै गठबन्धन गरि उम्मेदवारी दिएका छन् ।
प्रदेश २ मा राष्ट्रिय सभाका चार सदस्यका लागि ८ जनाले उम्मेदवारी दर्ता गराएका छन् ।
निर्वाचनमा नेकपासँग राजपा र काँग्रेससँग समाजवादीले छुट्टाछुट्टै गठबन्धन गरि उम्मेदवारी दिएका छन्। महिला एकपदका लागि हुने निर्वाचनमा नेकपाका तर्फबाट तुलसाकुमारी दाहाल र नेपाली काँग्रेसका तर्फबाट नगिना यादव मैदानमा छन्। दलित एक पदका लागि नेकपाका राधेश्याम पासवान र समाजवादी पार्टीका रामपृत पासवानबीच प्रतिष्पर्धा छ।
अल्पसंख्यक १ पदका लागि नेपाली कांग्रेसबाट भोला पजियार र राजपाबाट शेखरकुमार सिंहले उम्मेदवारी दिएका छन् भने अन्य १ पदका लागि समाजवादीका अनिरुद्धकुमार सिंह र राजपाका मृगेन्द्रकुमार सिंह चुनावी मैदानमा उत्रेका छन्।
