ढल्केवर- आज ढल्केवरमा अवैध खोला दोहनको विरोध गर्दा टिपरले किचेर हत्या गरिएका दिलिप भनिने ओम प्रकाश महतोको १३ औँ दिनको पुण्यतिथिमा आयोजित श्रद्धाञ्जली तथा वृक्षाराेपण कार्यक्रमलाइ सम्बाेधन गर्दै पूर्वराष्ट्रपति यादवले पर्यावरण संरक्षणका लागि दिलीप महतोको अभियानलाई निरन्तरता दिनुपर्ने बताए। चुरे फडानी तथा अवैध दोहनविरुद्ध सचेत नागरिक अगाडि आउनु पर्ने बताउँदै यादवले अगामी दिनमा दिलीपकोजस्तो घटना हुन नदिन तीनै तहका सरकारसंग आग्रह गरे।
अवैध उत्खनन् तथा चुरे विनाशले अन्नको भण्डार मानिने तराई मधेश मरुभूमि बनिरहेकोमा भन्दै उनले चिन्ता व्यक्त गरे।
‘समयमै चुरे र अवैध दोहनतर्फ सबै गम्भीर हुनुपर्छ। नभए अतिवृष्टि, अनावृष्टि, सुख्खा जस्तो प्रकोप आउन धेरै दिन लाग्दैन,’ राष्ट्रपति यादवले भने ‘ दिनानुदिन पानीको सतह घट्नु, समयमा वर्ष नहुनु, खडेरी पर्नु जस्ता कारण यसैको संकेत हो। यसबाट बच्न हामी सबै पर्यावरण संरक्षणमा लाग्नुपर्छ।’
कार्यक्रममा कांग्रेस केन्द्रीय सदस्य एवं पूर्वमन्त्री महेन्द्र यादव, प्रदेश सांसद रामआशिष यादव, जिल्ला समन्वय समिति धनुषाका सभापति रामदव बनरैत यादव, मिथिला नगरपालिकाकी नगर उपप्रमुख तारा लामा बस्नेत लगायतले दिलीपको योगदान समाजले सदैव स्मरण गरिरहने बताउँदै उनलाई पर्यावरण शहिद घोषणा गर्न सरकारसँग माग गरेका थिए। कार्यक्रमको अध्यक्षता दिलीपका बुबा रामजीवन महतोले गरेका थिए।
