काठमाडौं- राष्ट्रियसभामा दर्ता भएको ‘नेपाल विशेष सेवा विधेयक’ले श्रीमान–श्रीमतीबीचमा भएको व्यक्तिगत कुराकानी हेर्न खोजेको हो भन्दै सांसदहरूले आलोचना गरेका छन्।
राष्ट्रिय सभामा दर्ता भएको विधेयकमा विरोधको सूचना दर्ता गराउँदै एक सांसदले व्यक्तिगत निगरानीका लागि ल्याएको विधेयक फिर्ता लिन माग गरे।
विरोधको सूचना राख्दै सांसद प्रकाश पन्तले सरकारले ल्याएको नेपाल विशेष सेवा विधेयकका दफामाथि गम्भीर प्रश्न उठाएका हुन्।
सोमबार बसेको राष्ट्रियसभाको बैठकमा विधेयकमाथि विरोधको सूचना दर्ता गराउँदै सांसद पन्तले सरकारले नागरिक स्वतन्त्रता र मौलिक हक खोस्न खोजेको आरोप लगाए।
‘यो विधेयकले नागरिकको स्वतन्त्रता र मौलिक हक खोस्दैछ। अब नागरिकका गोप्यभन्दा गोप्य कुरामा पनि सरकारको पहुँच हुनेछ,’ उनले भने, ‘यो विधेयकका केही दफा एकदमै खतरनाक छन्। विधेयक पास भएमा नागरिकलाई ठाउँको ठाउँ थुन्न सक्ने अवस्था आउँदैछ।’
सांसद पन्तले यो विधेयक पारित भएमा पत्रकारहरुले पनि म्यासेज लेख्दा वा समाचार बनाउँदा पनि होस पुर्याउने दिन आउनेतर्फ सचेत गराए।
‘पत्रकारहरुले पनि अब ख्याल गरे हुन्छ। सम्पादकलाई लेखेका म्यासेज अब सरकारले पहिल्यै हेर्छ। यो विधेयक आएपछि अप्रत्यक्ष रुपमा अघोषित ‘सेन्सरसिप’ नै लाग्ने उनको दाबी थियो।
सांसद पन्तले नेपाल विशेष सेवा विधेयक नेपालको संविधानको नागरिक स्वतन्त्रता र मौलिक हकविरुद्ध रहेको जिकिर गरे।
‘सरकारले नागरिकको गुप्तचरी गर्न पाउँदैन। ज्यानमारा प्रकृतिका विधेयक फिर्ता लिन सरकारलाई आग्रह गर्दछु,’ उनले भने, ‘कसैले पनि नागरिकको स्वतन्त्रता खोस्न पाउँदैन।’
कम्युनिस्ट सरकारले अधिनायकवादको यात्रा तय गरेको दावी उनको छ।
सांसद पन्तले विरोधको सूचना दर्ता गराएपछि जवाफ फर्काउँदै अर्थमन्त्री डा. युवराज खतिवडाले विधेयकमाथिको विरोधको कुनै अर्थ नरहेको जिकिर गरे।
‘नेपालमा बसेर जासुसी गर्न सक्ने र देशबीचको सम्बन्ध बिगार्नेविरुद्ध पनि जासुसी त गर्नुपर्ला नि!,’ उनले भने, ‘त्यसैले यो कानुन जरुरी छ।’ अर्थमन्त्रीले जवाफ दिएपछि सांसद पन्तले पेस गरेको विरोधको सूचनालाई बहुमतले अस्वीकृत गरेको थियो। सरकारले पेस गरेको विधेयकमाथि सोमबारदेखि नै राष्ट्रियसभामा छलफल सुरु भएको छ।
