जनकपुर- समाजवादी पार्टी निकट युवा संघमा विवाद र असन्तुष्टि बढ्न थालेको छ ।
प्रदेश कमिटिले जिल्ला कमिटि गठन गर्दा आफ्नो विपक्षको व्यक्तिलाई राखेको भन्दै युवा संघका केन्द्रिय अध्यक्ष एवं प्रदेश २ कृषि, सहकारी तथा भूमि व्यवस्था राज्यमन्त्री योगेन्द्र राय यादवले असन्तुष्टि जनाएका छन् । उनले प्रदेश कमिटिको निर्णयलाई अमान्य हुने भन्दै आफै जिल्ला कमिटि गठन गर्न लागेको युवा संघका एक नेताले बताए ।
बाराको कलैयामा बसेको प्रदेश २ को प्रदेश कमिटिले बहुमतको आधारमा २ जनालाई मनोनित गरेका थिए । नाम नबताउने शर्तमा ती नेताले केन्द्रिय अध्यक्षले विधान मिचेर गर्न लागेको निर्णयले उनीमाथि कारबाही हुन सक्ने बताए ।
समाजवादी युवा संघको विधान अनुसार केन्द्रिय कमिटिले प्रदेश कमिटि गठन गर्ने र प्रदेशले जिल्ला कमिटि गठन गर्ने प्रावधन छ । तर, केन्द्रिय अध्यक्षले आफ्नो निहीत स्वार्थका कारण प्रदेश कमिटिको काममा हस्तक्षेप गरेको भन्दै असन्तुष्टि जनाएको बताइएको छ । केन्द्रिय अध्यक्ष यादवले प्रदेश २ का सबै जिल्लामा अब आफैले जिल्ला कमिटि गठन गर्ने भन्दै समाजीक सञ्जालमा सूचना जारी गर्न थालेका छन् ।
