जनकपुर- मंसिर १४ गते हुने उपचुनाव नजिकिँदै गर्दा राजनीतिक दलहरु चुनावी प्रचार प्रसारमा अहिले देखि नै लागेको देखिन्छ । विभिन्न चाड पर्वको बहानामाम आयोजित शुभकामना आदान प्रदान कार्यक्रममा उपचुनावको लागि नेताहरुले भोट मागि रहेका छन् ।
आज महोत्तरीको पिपरा गाउँ पालिकामा नेकपा पिपरा कार्यसमितिले आयोजना गरेको छठ पर्वको शुभकामना कार्यक्रमलाई सम्बोधन गर्दै नेकपाका अध्यक्ष पुष्पकमल दाहाल प्रचण्डले उपचुनावमा आफ्नो पार्टीको उम्मेदवारलाइ गाउँपालिका अध्यक्षको खुलेर नै भोट मागे । सत्तासीन दल नेकपाका अध्यक्ष प्रचण्डले मधेसलाई भ्रष्टाचारमुक्त बनाउन, समृद्धिको बाटोमा डोर्याउन र संविधान संशोधनको लागि नेकपा उम्मेदवारलाई मतदान गर्नुपर्ने बताए ।
उनले भने, ‘पिपरा गाउँपालिकामा हुने उपचुनावमा नेकपाका उम्मेदवारलाई जिताउनुस् अनि हेर्नुस् विकासको गति ।’ अध्यक्ष प्रचण्डले मधेससँगको आफ्नो प्रेम निरन्तर कायम रहेको बताउँदै मधेसीकै मतले निर्वाचित भएपछि दोस्रोपटक प्रधानमन्त्री बन्ने मौका प्राप्त भएको बताए । दोस्रो संविधानसभा निर्वाचनमा सिरहाबाट उम्मेदवारी दिएका दाहालले सर्लाहीको हरिवनमा आयोजित चुनावी सभा मै पहिलोपटक मधेससँग ‘लभ’ परेको वक्तव्य सार्वजनिक गरेका थिए र त्यस यता उनले मधेस आउँदा पटक पटक सो कुरा दोहोर्याउँदै आएको आज पिपराको कार्यक्रम पनि उनले भने, ‘मधेससँग परेको लभ निरन्तर कायम रहेको प्रतिबद्धता पुनः दोहोर्याउन चाहन्छु ।’
उनले भने, ‘भिट्टामोड-जनकपुर, फास्ट ट्रयाक र हुलाकी राजमार्ग जस्ता तीनटा ठूला सडक योजनाहरूमा बजेट हालेर म दोस्रो पटक प्रधानमन्त्री हुदा मधेसमा विकास योजना शुरू गराएको हुँ ।’ उनले चार वर्ष देखि निर्माण भइरहे पनि अधुरै रहेको जनकपुर–भिट्ठामोड राजमार्गको सडक खण्ड निर्माण कार्यमा गति बढाउन विभागीय मन्त्रीसँग माग गरे । उनले भने, ‘अब पनि कुनै बहानामा सडक निर्माण ढिलाइ भयो भने म पार्टी अध्यक्ष कै हैसियतले पनि जनतासँग आन्दोलनमा उत्रिन्छु ।’ प्रचण्डले भने, ‘यो सडकको विषयमा काठमाडौं फर्किएर प्रधानमन्त्रीसँग कुरा गर्नेछु र युद्धस्तरमा काम भएन भने म पार्टी अध्यक्ष भएर पनि मधेशमा गएर आन्दोलन गर्नुपर्ने अवस्था नआओस् भन्नेछु ।’
प्रचण्डले मधेसको साथमा नेकपा रहेको जिकिर गर्दै उपेन्द्र यादव संग आफू र प्रधानमन्त्री केपी शर्मा ओलीले संयुक्त रुपमा हस्ताक्षर गरी संविधान संशोधनको लागि गरेको प्रतिबद्धता स्मरण गर्दै संविधान संशोधन हुनेमा कुरामा ढुक्क हुन आग्रह गरे । आफू प्रधानमन्त्री भएका बेलामा दुई पटक संसदमा संविधान संशोधन प्रस्ताव लगेको स्मरण गर्दै उनले कार्यक्रममा भने, ‘संविधान मधेशी जनताले भने अनुसार आएन की भन्ने जुन प्रश्न छ, संविधान संशोधनका लागि दुई बुँदे सहमतिमा प्रधानमन्त्री ज्यू र मैले हस्ताक्षर गरेका छौं र संविधान संशोधन हुन्छ नै ।’
कार्यक्रममा नेकपाका महासचिव विष्णु पौडेलले संघमा दुई तिहाइको सरकार चलाईरहेको आफ्नो पार्टीलाई नै मतदान गर्न पिपरावासीलाई आग्रह गरे ।
