महेन्द्रनगर (धनुषा) — दसैं मेलाका अवसरमा पहिलो पटक धनुषाको क्षीरेश्वरनाथ नगरपालिकाकाे मुख्यबजार केन्द्र महेन्द्रनगरको जैसीबाबा धर्मशाला परिसरमा सञ्चालन गरीएको अस्थायी बजारमा सस्तो सामान खरिद गर्ने सर्वसधारणको घुइँचो लागेको छ । उक्त बजारमा पुग्ने अधिकांसले ६ महिनादेखि वर्ष दिनसम्म पुग्ने दैनिक उपभोग्य वस्तु खरिद गर्छन् ।
घटस्थापनाको दिन सुरु भएर अष्ठमीसम्म सञ्चालन हुने उक्त बजारमा बाहिर र भित्रगरी राखिएको स्टलमा सामान किन्नेको भीड लाग्ने गरेको छ ।
बजारबाट मुख्यत: चाउचाउ, अगरबत्ती, साबुन, सर्फ, चियापती, बिस्कुट, चिनी, कपडा, चप्पलजुत्ता र शृंगारका सामानको बिक्री बढी हुने क्षीरेश्वरनाथ उद्योग वाणिज्य संघका अध्यक्षा सुरेश यादवले बताए । सस्ता बजारको नामले लगाइएको यस दसैं बजारका स्टलहरूको कारोबार दैनिक लाखौंमा हुने गरेको यादवले बताए । दसैं बजार भनिए पनि सर्वसाधारणले अस्थायी बजारलाई सस्ता बजार बुझ्छन् ।
यहाँ बाहिरको बजारभन्दा कम मूल्यमा सामान पाइने भएर सस्तो बजार भनिएको साबुनको मोलतोल गर्दै भेटिएकी शान्ती देवीले भनिन्, ‘बाहिर १५ रुपैयाँमा पाइने साबुन यहाँ १२ रुपैयाँमै पाउँछन् ।’ साबुन र सर्फका स्टाल सञ्चालकहरूले थोक मात्रामा बिक्री हुने भएर बजारको भन्दा सस्तोमा सामान बेच्न सम्भव भएको बताए । बजारमा सबैभन्दा बढी साबुन र सर्फ बिक्री भएको यही बजार हो ।
धनुषाको सदरमुकाम जनकपुरमा प्रत्येक बर्ष दशैंमा लाग्दै आएको सस्तो बजार (दशैं बजार) यस बर्ष महेन्द्रनगरमा लाग्दा उपभोक्ताहरु हर्षित भएका छन् ।
नेपालीहरुको महान चाड विजयमादशमी, तिहार तथा छठ पर्वको लागि आवश्यक सरसामानहरु एकै ठाउँमा पाईयोस् र उपभोक्तालाई सजिलो होस् भनी उदेश्यका साथ क्षीरेश्वरनाथ वाणिज्य संघले यस बजारको आयोजना गरेको छ ।
आइतवारदेखि सुरु भएको याे बजार जैसीबाबा धर्मशाला भवनको भित्र र टेन्ट लगाएर बाहिर गरी करिब ३८ स्टलबाट दैनिक कारोबार अनुसार अहिले सम्म २ करोड नाघेको संघका महासचिव दिपक साहले बताए । बजार सुरु भएको ५ दिनमा २ करोडभन्दा बढीको कारोबार भएको छ, साहले भने, ‘ पहिलो पटक लगाएको बजारको व्यवस्थापन उद्योग वाणिज्य संघले गरेको छ ।’
स्टलबाट संकलन हुने रकममध्ये केही प्रतिशत धर्मशालाको व्यवस्थापनमा खर्च गरेर बाँकी संघले राख्ने गरेको उपाध्यक्ष विनय साहले बताए । सोही पैसाबाट स्टलको सजावट, टेन्टका सामान, बिजुलीलगायत व्यवस्था गरिरहेको साहले बताए ।
नेपालको चिरपरिचित बजारमध्ये एक रहेको धनुषाको सखुवा बजार मै सस्तो बजारको आयोजना गरिएको हो ।
