चितवन, ८ भदौ। टेलिभिजन कार्यक्रम प्रस्तोता रवि लामिछानेसहित तीनै जनाविरुद्ध आत्महत्या दुरुत्साहनसँग सम्बन्धित मुद्दाको फाइल सरकारी वकिलको कार्यालयमा पेस भएको छ । जिल्ला प्रहरी कार्यालय, चितवनले उनीहरुमाथि अनुसन्धान गरेर सरकारी वकिलको कार्यालयमा आइतबार फाइल पेस गरेको हो ।
पत्रकार शालिकराम पुडासैनीको मृत्यु प्रकरणको अनुसन्धान गर्न प्रहरीले लामिछानेसहित युवराज कँडेल र अस्मिता कार्कीलाई हिरासतमा राखेर अनुसन्धान गर्दै आएको छ ।
अब उनीहरुविरुद्ध थुनछेक बहस हुने छ । बहसपछि उनीहरुलाई थुनामै राख्ने कि धरौटी वा साधारण तारेखमा छाड्ने भन्ने निर्णय हुनेछ ।
पुडासैनी चितवनको एक होटलको कोठाभित्र झुण्डिएको अवस्थामा फेला परेका थिए । उनले मोबाइलमा भेटिएको भिडियोमा पुडासैनीले आफ्नो मृत्युको कारण लामिछाने, कँडेल र कार्की भएको बताएपछि प्रहरीले तीनै जनालाई साउन ३० अनुसन्धानको लागि पक्राउ गरेको थियो ।
अदालतबाट दुईपटक गरी दिएको १० दिनको म्याद शनिबार रातिबाट सकिएसँगै अहिले उनीहरुलाई फेरि अदालत लगिएको छ ।
यद्यपी प्रहरीले उनीहरुविरुद्ध ५ वर्ष जेल सजाय र ५० हजार जरिवानाको माग गर्दै अभियोग पत्र दर्ता गर्ने तयारी गरेको छ ।
आइतबार उनी रिहा हुने आशमा चितवनमा जम्मा भएका रविका समर्थकलाई निषेधित क्षेत्र तोडेर प्रदर्शन गर्न थालेपछि प्रहरीले उनीहरुलाई तितरवितर पारेको छ ।प्रहरीको कारबाहीविरुद्ध र रवि लामिछानेको रिहाइको माग गर्दै अहिले भइरहेको प्रदर्शनलाई तितरवितर पर्दा केही रवि समर्थक घाइते भएका छन् ।
