जनकपुर – बुधबारदेखिकाे अविरल वर्षाले जनकपुरकाे उडान मौसममा सुधार नहुञ्जेलसम्मका लागि रद्द गरिएको छ ।  रन वेमा ३-४ फीट सम्म पानी जमेको कारण सेवा अवरुद्ध भएको छ ।

    

जनकपुर विमानस्थल भित्र रहेको टर्मिनल, भिआईपी कक्ष, रन–वे मैदान लगायतका स्थल जलमग्न भएपछि मौसम सुधार नहुञ्जेलसम्मका लागि विमान उडान रद्द गरिएको जनकपुर विमानस्थका प्रमुख सन्तोष ढकालले जानकारी दिए ।

विमानस्थलमा पानी जमेपछि शुक्रबारदेखि नै विमान उडान सेवा रद्द गरिएको उनले बताए ।

 मौसम सुधार भएपछि मात्रै विमान उडानसेवा नियमित संचालन हुने उनले जनाए ।

एयर पोर्टको यात्रु वेटींग रुम, सुरक्षा चेक जाँच कक्ष सहितको ठाउँमा पनि पानी ३ फीट पानी जमेको छ ।

जनकपुर र काठमाण्डौंको यति र बुध एयर लाइन्सको ५ उडान सेवा जनकपुर एयर पोर्टबाट संचालन हुने गर्दछ ।

बाढीका कारण प्रदेश २ को सडक सञ्जाल अस्तव्यस्त

अविरल वर्षासँगै आएको बाढीका कारण प्रदेश २ को सडक सञ्जाल अस्तव्यस्त भएको छ । पूर्व पश्चिम राजमार्गसँगै प्रदेश २ भरीकै भित्री सडकहरु निर्वाध रुपमा सञ्चालन हुन सकेको छैन । बाढीले केही स्थानको सडक डुबानमा पारेको छ भने राजमार्ग सहित केही स्थानमा पुल बगाएको प्रदेश २ को प्रदेश ट्राफिक प्रहरी कार्यालय पथलैयाले जनाएको छ ।

पूर्व–पश्चिम राजमार्गको पथलैया निजगढ सडक खण्ड अर्न्तगत बाराको निजगढ बजार क्षेत्रको लचकामा पानीको बहाव बढेर शुक्रबारदेखि डाइभर्ट गरिएको सवारी साधन पानीको बहाव कम भएसँगै शनिबार बिहानदेखि निर्वाध रुपमा सञ्चालनमा आएको कार्यालयले जनाएको छ ।