जनकपुरधाम १५ फागुन
जिल्ला अनुगमन समिति धनुषा बजार अनुगमनमा पुनः सक्रियता देखाएको छ । केही महिना अघि मात्र लगातार जनकपुर, सपही, लक्ष्मीनिया, महेन्द्रनगर लगायतका बजारमा अनुगमन गरेको जिल्ला अनुगमन समितिले बुधवारबाट पुनः बजार अनुगमनलाई तिव्रता दिएको हो ।
जिल्ला प्रशासन कार्यालय धनुषाका प्रशासकिय अधिकृत समेत रहेका बजार अनुगमन समिति संयोजक दिनेश साहका अनुसार बुधवार पेट्रोल पम्प र एलपी ग्यास पसललाई लक्षित गरेर अनुगमन गरिएको थियो ।
पेट्रोल पम्पमा अनुगमनको क्रममा ५ लिटर भएको चेक मेजरमा जाँच गर्दा मापदण्ड भित्र रहेको गुणस्तर तथा नापतौल कार्यालय जनकपुरका सहायक निरिक्षक बिरेन्द्र उपाध्यायले बताए । पेट्रोल र डिजल शुद्ध भएको नभएको बारे जाँच गर्न नमुना संचालन समेत गरिएको गुणस्तर तथा नापतौल कार्यालय जनकपुरका सहायक निरिक्षक उपाध्यायले बताए ।
बत्ती नभएका कारण लक्ष्मीपुर बगेवा वार्ड नं. ६, कुम्हरौडामा अखलेश मिश्रले संचालन गरेको लक्ष्मीनिया आयल सेन्टरमा नमुना संकलन नगरी अनुगमन टोली रित्तै हात फर्केको थियो । अनुगमनको क्रममा जनकपुर वार्ड नं. १४ स्थित मुजेलियामा किसुन साहले संचालन गरेको नेहा ट्रेडर्सको बिल र ग्यास रिफलिङ गर्ने औजार नियन्त्रणमा लिएको छ ।
संचालक साहले एउटा ग्यास सिलिङडारको १ हजार ४ सय ५० रुपैयासम्म लिएको तथा मिथिला बिहारी न.पा. वार्ड नं. ३ मा दर्ता कायम देखिएको आकाश ट्रेडर्सको नाममा समेत बिल काटिएको देखिएपछि अनुसन्धानको लागि बिल र लिफलिङ गर्ने औजार नियन्त्रणमा लिएको अनुगमन टोलीले जनाएको छ ।
ग्यास रिफिलिङ गर्नु समेत कानुन विपरित कार्य देखिएकाले अनुसन्धानको लागि सम्पुर्ण कागजात सहित जिल्ला प्रशासन कार्यालयमा उपस्थितिको लागि निर्देशन दिइएको अनुगमन टोली संयोजक दिनेश साहले बताए ।
यस्तै अनुगमनको क्रममा जनकपुर वार्ड नं. १४ स्थित नविन कुमार साहले संचालन गरेको वर्षा हार्डवेयर र जनकपुर वार्ड नंं. ८ स्थित दिनेश रायले एलपी ग्यास बिक्रि गर्ने गरी संचालन गरेको लक्ष्मी ट्रेडर्समा समेत अनुगमन गरिएको थियो ।
अनुगमनको क्रममा घरेलु तथा साना उद्योग कार्यालयका दर्ता भएको कागजपत्र, पान नम्वर, नापतौल कार्यालयको कागजपत्र लगायत चेकजाँच गरी देखिएको कमीकमजोरीलाई यथाशिघ्र सुधार गर्न निर्देशन दिएको घरेलु तथा साना उद्योग कार्यालयका जितेन्द्र प्रसाद सिंहले जनाए ।
जिल्ला प्रशासन कार्यालय धनुषाका प्रशासकीय अधिकृत दिनेश साहको संयोजकत्वमा गरिएको अनुगमन टोलीमा गुणस्तर तथा नापतौल, घरेलु तथा साना उद्योग कार्यालय, जिल्ला प्रहरी कार्यालय, संचारकर्मी लगायतको प्रतिनिधिको सहभागिता थियो ।
