जनकपुर, माघ २१ गते
नेपाली कांग्रेसका उपसभापति बिमलेन्द्र निधीले वर्तमान सरकार अधिनायकवादतर्फ उन्मुख भएको बताएका छन् । उनले ओली सरकारले लोकतन्त्र र संघीयता समाप्त पार्न खोजेको आरोप लगाउंदै जनताको हितमा सरकार केही गर्न नसकेको आरोप लगाए ।
देशव्यापी रुपमा कांग्रेसको विरोध प्रर्दशन कार्यक्रम अन्तर्गत आज धनुषाको जनकपुरमा भएको विशाल विरोध ¥याल पछिको सभालाई सम्बोधन गर्दै नेता नीधिले ओली सरकार लोकतन्त्र विरोधी , किसान विरोधी , मजदुर विरोधी , अधिनायकवादी , सर्वसत्तावादी र लोकतन्त्रको मुल्य मान्यता विरोधी रहेको बताए ।

नेपाली कांग्रेसका उपसभापति विमलेन्द्र निधिले ओली सरकारले व्यवहार नसुधारे देशमा आन्दोलनको आँधीवेरी ल्याउने चेतावनी दिए । उनले भने, ‘प्रतिपक्षको आवाज दबाएर सरकारले मार्शलको आडमा कानुन पारित गरेको छ ।’
निधिले संविधान, बिधी, पद्धति र नियम कानुन उलंघन गरेर सरकार अधिनायकवादतर्फ जान खोजेको बताए । उनले सरकारले प्रतिपक्षी दलका नेतालाई भूमिकाविहिन बनाएको भन्दै असन्तुष्टी जनाए ।
जनकपुर चुरोट कारखानाको सम्पतिलाई सरकारले टुक्रा–टुक्रा पारेर बिक्री गर्ने रणनीति बनाएरको दाबी गर्दै उनले प्रदेश सरकारले हस्तक्षेप गर्नुपर्ने बताए । प्रदेशले चुरोट कारखानाको सम्पति संरक्षण गर्न नसके नालायक साबित हुने निधिको भनाइ थियो । उनले कम्युनिष्ट सरकारले जनकपुर चुरोट कारखानालाई पनि प्राईभेट पब्लिक साझेदारीको नाममा बेच्ने र कमिसन खाने योजनामा रहेकोले प्रदेश २ का जनतालाई आन्दोलनका लागि तयार रहन आग्रह गरे ।
वीरगन्जमा अवस्थित विपी उद्दान केन्द्रको जग्गामा शहीदपार्क निर्माण गरिएकोमा पनि उनले बिरोध गरे । एक साताभित्र निर्णय फिर्ता लिन आग्रह गर्दै उनले फिर्ता नलिए प्रदेश सरकार बिरुद्ध पनि आन्दोलन गर्ने चेतावनी दिए ।
वर्तमान सरकार अपराधी संरक्षण गर्ने सरकार भएको आरोप लगाउंदै नीधिले हालसम्म निर्मला पन्तको हत्यारालाई कारवाहीको दायरामा ल्यान नसक्नु यसको उदाहरण रहेको बताए ।
हाल देशमा महंगीले आकाश छोई सकेपनि सरकार यसलाई नियन्त्रण गर्न उदासिन रहेको बताए ।
नेपाली कांग्रेस धनुषाका सभापति महेशशंकर गिरीको अध्यक्षतामा जनकपुरको रेल्वे स्टेशन परिसरमा सभालाई सम्बोधन गर्दै निधीले अहिलेको कम्युनिष्ट सरकारले संसदमा मर्यादापालक लगाएर नियम कानुन मिचेर जर्बजस्ती कानुन पास गर्ने जस्तो अपराध गरिरहेकोले जनता कम्युनिष्ट सरकारबाट सचेत हुनुपर्ने बताए ।
प्रदेश २ को जनता नक्कली मधेशवादी दलहरुको विरोधमा ओर्लन तयार रहनुपर्ने बताउँदै नेता निधिले प्रदेश सरकारले पनि कथित मधेशवादको भ्रम सिर्जना गरि मधेश विरोधी कार्य गरिरहेको आरोप लगाए ।
विरोध सभालाई नेपाली कांग्रेसका केन्द्रिय सदस्य महेन्द्र यादव , रामकृष्ण यादव , जिल्ला उपसभापति संतोष यादव लगायतका नेताहरुले सम्बोधन गरेका थिए ।
सभा अघि जनकपुर उपमहानगरपालिका वडा नं. ४ स्थित पार्टी कार्यालयबाट निस्केको विशाल जुलुश मुरली चोक , राम चोक , शिव चोक , भानु चोक हुंदै रेलवे स्टेशनमा गएर कोणसभामा परिणत भएको थियो ।-शिस