जनकपुर-कर्मचारी मिलन केन्द्रको पिकनिकमा गएर फर्किर्दै गर्दा भएको सवारी दुर्घटनामा बाराका सशस्त्र प्रहरी उपरीक्षक (एसपी) बलराम पोखरेलको मृत्यु भएको छ । सहिद हिरालाल गौतमको स्मृति पार्कमा आयोजित पिकनिक सकेर फर्किदै गरेको ना१झ १६३३ नम्बरको गाडी दुर्घटना हुँदा बाराका प्रमुख जिल्ला अधिकारी (सिडिओ) गणेश भट्टराई घाइते भएका छन् ।
सिडिओ भट्टराई गम्भीर घाइते छन् भने चालकसहित अन्य तीनजना घाइते छन् । गाडी सडकबाट १० मिटर खसेको छ ।
सिडिओ र एसपी सवार गाडी पथलैया निजगढ सडकखण्डको पसाहा पुलनजिक दुर्घटना भएको हो । रोकिराखेको ट्याक्टरको ट्रेलरमा उनीहरु सवार स्कोर्पियो गाडी ठोक्किएर दुर्घटना भएको हो ।
गाडीमा सवार एसपी पोखरेललाई दुर्घटना लगत्तै सिमरास्थित अल्पाइन अस्पतालमा लगिएको थियो । अस्पताल पुर्याएपछि चिकित्सकले उनलाई मृत घोषणा गरेका हुन् ।
गम्भीर घाइते सिडिओ भट्टराईलाई थप उपचारका लागि वीरगन्जको हेल्थ केयर अस्पताल पठाइएको छ ।
गाडी चालक जगत पट्टेल, सशस्त्र प्रहरी हवल्दार सञ्जयकुमार यादव र नेपाल प्रहरीका हवल्दार शम्भु गुरुङको स्थानीय अस्पतालमा उपचार भइरहेको प्रहरीले जनाएको छ । गम्भीर घाइते भट्टराईलाई थप उपचारका लागि आजै राति नाइट भिजन हेलिकप्टरमार्फत काठमाडौं लैजाने तयारी गरिएको छ ।
