अन्डरग्राउन्ड र्‍याप गीत गाएर उदाएका समीर घिसिङ अर्थात् भीटेनको व्यस्तता बढ्दै गएको छ । उनका र्‍याप गीतमा नेपाली भाषाकै प्रयोग बढी हुन्छ । नेपालीपन झल्कने यस्ता गीत युवा दर्शक–श्रोताहरूले मन पराएका छन् । उनले सन् २०१५ मा ‘गरिब’ गीत रेकर्ड गराए । यो नै उनको रेकर्डेड डेब्यु गीत थियो । एल्बम ननिकाले पनि उनका विभिन्न गीत युट्युबमा उपलब्ध हुन्छन्, जसमा मान्छे खत्तम, लाहुरेको फेसन, खलासी, चुरोट, तातो न छारो, बहिनी, सिमसिमे पानी, हालखबर, अन्तिम चाहना, हिम्मत, इन्ट्रो आदि प्रमुख छन् ।

अहिलेसम्म गीत सुन्थे । अब गीत हेर्छन् । अब गीत किन्नु पनि पर्दैन, युट्युबमार्फत हेर्न सकिन्छ, तैपनि एल्बम बजारमा ल्याउँछु, भीटेनले भने । यद्यपि त्यसका लागि केही महिना कुर्नुपर्नेछ । उनी आफैं गीत सिर्जना गर्छन् । संगीत सयोजनमा भने अरूको साथ लिन्छन् । पेमा मानसिङ तामाङ, सुरज थपलिया हाइप, लुगेन विट्सले उनका गीतमा संगीत संयोजन गरेका छन् । कुनै कुराले मन बिझायो भने उनी गीत सिर्जना गर्छन्, त्यो पनि प्राय: एकान्तमा । 

अहिले उनका थुप्रै फ्यान भैसकेका छन् । लेडिज फ्यानले प्रपोज पनि गर्छन । प्रपोज त अति नै आउँछ, तर प्रपोजलाई एसेप्ट गरेर लभमा छिर्छु भन्ने छैन’ उनले भने । जीवन बिताउने खालकी केटी साथी नभएको र विवाहका बारेमा नसोचेको लजालु स्वभावका घिसिङले बताए ।

भीटेन कार्यक्रमको सिलसिलामा दुबई, अस्ट्रेलिया, कोरिया, जापान, बेलायत आदि देशमा पुगिसकेका छन् भने नेपालका काठमाडांै, पोखरा, चितवन, हेटौडा, बुुटवल, धरान आदि ठाउँमा प्रस्तुति दिएर दर्शकको माया बटुलिसकेका छन् । उनी प्राय:जसो कार्यक्रममा एक्लै पुग्छन् । नेपालका कार्यक्रममा १ लाख रुपैयाँसम्म पारिश्रमिक लिने गरेका छन् । भीडले माया व्यक्त गर्दा उनी उत्साहित हुन्छन् । जति टाढा जान्छु त्यति नै माया देखिन्छ, ज्यानै दिन खोज्ने फ्यान भेटिन्छन्, उनले भने । बच्चादेखि युवा युवती अनि वृद्धवृद्धासम्मको साथ कन्सर्टमा उनले पाउँछन् । उनले विभिन्न ठाउँका कन्र्सटमा एउटै गीत दर्शकको आग्रहमा तीन पटकसम्म पनि सुनाउनुपरेको छ । 

र्‍याप भनेको कच्चा शब्द र केही अश्लिल पनि हुन सक्छ, प्राय:गरी बोलिरहेजस्तो, झर्किएजस्तो । र्‍याप जस्तो पनि हुन सक्छ । बुझ्न खोज्नुपर्‍यो । सकारात्मक सोच राखेर हेर्ने–सुन्ने बानी बसाल्नुपर्‍यो अनि मात्र नेपाली र्‍यापलाई अन्तर्राष्ट्रिय स्तरसम्म पुर्‍याउन सकिन्छ, भीटेन भन्छन् । 

उनको व्यस्तता बढ्न थालेको डेढ वर्ष मात्र भयो । समीर घिसिङ सबैका भावनालाई गीतमार्फत समेट्ने प्रयास गर्छन् । उनले रमाइला, हाँस्ने, नाच्ने, दु:ख, सुख सबै प्रकारका गीत गाएका छन् । आगामी दिनमा पनि यस्तै गीत गाइरहने उनको योजना छ । 

उनी २१ वर्षअघि रौतहटको चन्द्रनिगाहपुरमा जन्मिएका हुन् । बुबा कपिल लामा र ममी हेम लामाको पहिलो सन्तानका रूपमा जन्मिएका घिसिङका दुई बहिनी छन् । बाल्यकालमा उनी अलि मोटा थिए अनि केही लोसे पनि । सबैले उनलाई मोटे भनेर जिस्काउथे । पछि पढाइको सिलसिलामा होस्टल बस्न थाले अनि फुटबल खेल्थे । त्यसपछि उनको मोटोपन कम भयो । त्यतिबेलै उनले गीत गाउने अनि र्‍याप हान्ने काम सुरु गरे । बिस्तारै त्यही अनुसारका साथी फेला पारे । उनको घरमा उफर थियो, हेडफोनको माइकलाई उफरमा जोडेर गीत गाउँथे उनी । भ्वाइस रफ आए पनि त्यसमै गीत सुनाउँदै उनले आफ्नो प्रतिभा बाहिर ल्याए । घिसिङ साथीहरूसँग र्‍याप व्याटल पनि गर्थे । उनी नेपाली र्‍यापलाई अन्तराष्ट्रिय स्तरमा पुर्‍याउनुपर्छ भन्ने सोचका साथ अगाडि बढे । 

एसएलसी उत्तीर्ण गरेपश्चात उनी काठमाडांै हान्निए । पढ्नका लागि काठमाडौं आएका भीटेनलाई गीतसंगीतको नसाले तानिहाल्यो, तर उनी खासमा काकाको घरमा बस्ने कलेज पढ्ने अनि फुर्सदमा काकालाई व्यवसायमा सघाउने गरी काठमाडांै आएका थिए । काम सकेर उनी गीत रेकडिङ गर्न जान्थे । गीत रेकर्ड गर्दा राती अबेर हुन्थ्यो । डेरामा पुग्दा काकाले ढोका खोल्दिएनन्, गाली गरे अनि उनले सडकमै रात बिताए । यस्तो पटक–पटक भयो, तर त्यसमा उनलाई दु:ख लाग्दैनथ्यो । आनन्द लाग्थ्यो । किनभने उनी त्यो दिन गीत रेकर्ड गरेर आएका हुन्थे । साथीको घरमा स्टुडियो भएकाले रेर्कडिङ गर्न पैसा खर्च गर्नु पर्दैनथ्यो । त्यसले केही सहजता भने थियो । 

उनले जीवनमा सु:ख भन्दा दु:ख धेरै देखेका छन् । उनीसँग पैसा हुँदैनथ्यो, साथीहरूले गाडी भाडा भनेर पैसा दिन्थे, तर त्यो पैसा उनी चुरोट खाएर सक्थे अनि धुमबाराहीदेखि ह्वाइट गुम्बासम्म पैदले हिँड्थे । उनलाई पढ्न समेत झयाउ लाग्थ्यो, त्यसैले पढ्न छोडे । पछि पश्चाताप भयो अनि केहि वर्षको ग्यापपश्चात् फेरि कलेज ज्वाइन गरे । हाल उनी व्यस्थापन संकायमा स्नातक तह अध्ययनरत छन् । भी–टेनलेपहिलोपल्ट गीतबाट कमाएको रकम ५ हजार थियो । बुटबलमा कार्यक्रम आयोजना गरी २५ हजार दिने गरी उनलाई बोलाइयो, तर पछि ५ हजार मात्र दिएर पठाइयो’, उनले भने । 

भीटेन अहिले थान्का पेन्टिङको व्यवसायसमेत गर्छन् । त्यहाँबाट सामान्य खर्च धान्न सहज भएको छ । उनको आमालाई माइग्रेनको समस्या छ भने बुबा मजदुरी गर्छन् । दुई बहिनी पढ्दैछन् । अहिले अलि अलि घर खर्च पठाउन सक्ने भएको छु, –घिसिङले बताए । 

मेहनत गरेर नयाँ–नयाँ गीत ल्याउने तयारी गरिरहेका भीटेनले भारतीय र्‍यापरसँग मिलेर गीत तयार पार्ने योजनासमेत बनाएका छन् । यसबाट बिस्तारै नेपाली र्‍यापलाई अन्तर्राष्ट्रिय स्तरमा पुर्‍याउन मद्दत मिल्ने उनको बुझाइ छ ।

कान्तिपुर  साप्ताहिकको लागी राजा राम पौड्यलको रिपोर्ट