प्रवीण कुँवर चार वर्षदेखि गोंगबुमा स्वस्तिका गेस्ट हाउस सञ्चालन गर्दै आएका थिए। मंसिर ११ गते साँझसाढे ६ बजे उनका ८ वर्षीय छोरा प्रयास कुँवर अचानक बेपत्ता भए।
स्याङ्जा जिल्लाका कुँवरको गेस्ट हाउसमा एक महिनाअघि महेन्द्र सार्की काम खोज्दै आइपुगेका थिए। स्याङ्जाबासी नै रहेका कारण कुँवरले गेस्ट हाउसमा काम दिएका थिए। सार्की ड्राइभरको रुपमा काम गरिरहेका थिए।
२२ वर्षीय सार्की राम्रोसँग काम गर्दैनथे। महानगरीय अपराध महाशाखाका अनुसार सार्की ढिलो गरी काममा आउने गर्थे। राम्ररी काम नगरेपछि सञ्चालक कुँवरले सार्कीलाई कामबाट निकालिदिने धम्की दिइरहेका थिए।
मंसिर ११ गते पनि कुँवरले सार्कीलाई चेतावनी दिएका थिए। सोही चेतावनीको ‘रिस फेर्न’ सार्कीले बालकको अपहरण योजना बनाएको महाशाखा प्रमुख धीरजप्रताप सिंहले बताए।
सिंहका अनुसार मिठाइ खुवाउने भनेर फकाएर सार्कीले बालकलाई उठाएका थिए। त्यसैदिन राति रानीबारीको जंगल लगेर सार्कीले बालकको घाँटी थिचेर हत्या गरेको सिंहले बताए।
बालक हत्यामा संलग्न महेन्द्र सार्की।
बालक र सार्की सँगसँगै बेपत्ता भएको भोलिपल्ट प्रहरीलाई खबर गरिएको थियो। खबर पाउनेवित्तिकै अपराध महाशाखाको टोली सार्कीको खोजीमा जुट्यो।
सार्कीलाई बिहीबार गोंगबुस्थित डेराबाटै प्रहरीले समात्यो। तर, सार्की समातिएपछि अनुसन्धान गर्दा अपहरण गरेकै राति बालकको हत्या गरेको खुल्यो।
‘अपहरण भएकै दिन हत्या गरेको बयान दिएपछि रानीबारी जंगलमा खोज्दा आज झोलामा बालकको शव फेला पर्यो,’ सिंहले सेतोपाटीसँग भने।
सिंहका अनुसार पक्राउ परेका सार्कीमाथि अनुसन्धान थालिएको छ। बालकको शव पोस्टमार्टमका लागि त्रिवि शिक्षण अस्पताल लगिएको छ।
