शिरीष सम्बाददाता
जनकपुर २९ गते कार्तिक
धनुषाको विदेह नगरपालिका वडा नं. ५ मुडिबा बस्ने ६७ बर्षिय मानैर ठाकुर बडहीको हत्या भएको अवस्थामा शव फेला परेको छ ।
फिल्मी कथामा साक्षीको हत्या हुने गरेको घटना देख्न पाइने भएपनि मुरिवामा आपराधिक समूहले साँच्चिकै त्यस्तै घटना गराएको छ । स्थानीय विद्यालय नजिकै रहेको पोखरीमा ठाकुरको आँखामा छुरा घोपेर हत्या गरिएको अवस्थामा शव फेला परेको हो ।
गाउँकै एक महिलाको हत्या घटनामा ठाकुर बिहीवार जिल्ला अदालत धनुषामा वकपत्र दिन जाने तयारीमा रहेका थिए ।
अदालत जानु १ दिनअघि नै गाउँमै ठाकुरको हत्या भएको छ । मृतकका आफन्तका अनुसार स्थानीय बहादुर मण्डलले ४ दिनअघि ठाकुरलाई अदालतमा वकपत्र दिन नजान धम्की दिएका थिए ।
लक्ष्मी मण्डलकी श्रीमति हत्या काण्डमै मृतक मानैर भोली (शुक्रबार) धनुषा जिल्ला अदालतमा बकपत्र (गवाही) दिन जाने तयारीमा रहेका थिए । गत आईतबार मात्र बहादुर मण्डल र मानैरबीच गवाहीलाई लिएर भनाभन भएको थियो ।
बहादुर मण्डलले अदालतमा गवाही नदिनको लागि बारम्बार धम्की दिइरहेका थिए भने मानैरले उनलाई लापरवाही गर्दै आएका थिए । बहादुरले मानैरलाई यदि अदालतमा गवाही दिए मारिदिने धम्की दिएको मृतक मानैरकी पत्नीले बताईन् ।
बुधबार साँझदेखि हराएका मानैर विहान घरारी नजिकै रहेको समुदायिक विद्यालयको खाल्डोमा मृत फेला परेको थियो । मानैरको दुई ठाउँमा घर रहेको छ । एउटा गाउँमा र अर्को गाउँको छेउमा । मानैर अबेर साँझ विद्यालय नजिक रहेको मैदानबाट दाउरा ल्याउन गएका थिए । अबेरसम्म नआएपछि उनलाई खोज्न घरबाट उनका छोरा र बुहारीहरु बाहिर निस्किए र रातभरि नै खोजे तर भेटाएनन् । विहिबार विहानै खाल्डोमा मृत अवस्थामा कपडामा बेरिर फालिएको तथा माथिबाट घाँसले छोपेको अवस्थामा फेला परेपछि हत्या भएको खुलेको हो ।
यता, घटनास्थल पुगेका ईलाका प्रहरी कार्यालय खजुरीका ईन्चार्ज शेषराज थन्दारले हत्या कसले र किन गरेको बारे अनुसन्धान भईरहेको तथा शवलाई पोष्टमार्टमको लागि जनकपुर अञ्चल अस्पताल पठाउने तयारी भईरहेको बताए ।
