शिरीष सम्बाददाता
महेन्द्रनगर (धनुषा )४ गते असाेज
सरकारले जारी गरेको सवारी ऐन चालकमैत्री नभएको भन्दै यहाँका सवारी चालकको मंलबारदेखि सार्वजनिक आवागमन ठप्प पारेका छन् । लगातार दुई दिनदेखिको बन्दका कारण महोत्तरीलगायतका छिमेकी जिल्लाको जनजीवन प्रभावित छ ।
सरकारले जारी गरेको सवारी ऐन यातायात मजदुरमैत्री नभएको भन्दै नेपाल स्वतन्त्र सवारी चालक संघर्ष समितिले आह्वान गरेको अनिश्चितकालीन आन्दोलनले सवारी साधन ठप्प भएपछि मकवानपुरको हेटौंडाबाट बाराको अमलेखगन्जतर्फ हिंड्दै गरेका यात्री ।
वर्दिवासस्थित जिल्ला ट्राफिक कार्यालयका प्रमुख डिल्लीप्रसाद मैनालीका अनुसार मंलवारको तुलनामा बुधवार यात्रु बोकेका पूर्वका केही साना सवारीले वीपी राजमार्ग हुदै काठमाडौं गएका थिए । तर ती सवारीलाई वर्दिवास चोकमा निगरानी गरिरहेको स्थानीय चालक समुहले रोकेर आफनै पेसागत हकहितकालागि आह्वान गरिएको बन्दको अवज्ञा नगर्न आग्रह गरेकाले बन्द थप सशक्त हुने देखिएको छ ।
बन्दप्रति ऐक्यवद्धता जनाउदै निर्माण व्यवसायीका चालकले काम गर्न छाडेपछि पूर्वपश्चिम राजमार्गलाई भारतीय सीमा जोड्ने माईस्थान–गौशाला–समसी २७ किमी सडकको कालोपत्रेको काम रोकिएको छ । सडक परियोजना निर्देशक अर्जुन शिवाकोटीका अनुसार कालोपत्रेका लागि टिप्पर, ग्रेडर, रोलरसमेत आधा दर्जन गाडीका चालक काममा नआउँदा कालोपत्रेको काम बीचमै रोकिएको हो । चालकले अकास्मात काम रोक्दा ठेकेदार कम्पनी लामा डाँफे गोल्डेन गुड जेभीलाई दैनिक ५ लाख बढी घाटा ब्यहोर्नु परको शिवाकोटीले जनाए ।
नेपाली चालकको आन्दोलनका कारण भारतबाट हुने आयात ब्यापारसमेत प्रभावित बनेको मलिवारास्थित जलेश्वर भंसार कार्यालयले जनाएको छ । प्रमुख भन्सार अधिकृत केशव भण्डारीका अनुसार मंलवारदेखि भारतबाट पेट्रोलियमलगायत भारतीय सामान आयात नहुँदा दैनिक करोड बढी राजस्व घाटा भएको छ ।
जनकपुर अंचल चालक भलाई संगठनका कोषाध्यक्ष दिलिप साहले यातायात व्यवस्थासम्बन्धी २०४९ को संशोधित ऐनले गल्ती नगरे पनि चालकले अपराधी बन्नुपर्ने अवस्था श्रृजना गरेकाले आन्दोलन बाध्यता बनेको जनाए ।
‘०७४ मा संशोधनपछि यो ऐनको केही बुँदा चालकमैत्री छैन,’ साहले भने, ‘त्यस्ता बुदा नसच्याए पेसा नै परिवर्तन गर्नुपर्ने बाध्यता श्रृजना भएकोले अनिश्चितकालका लागि बन्द आह्वान गरिएको हो ।’
