शिरीष सम्बाददाता

जनकपुर ३ असोज ।

प्रहरीको खोजी सूचीमा रहेका सिके राउतले हजारौं कार्यकर्ताको बीचमा संविधानको विरोधमा बाेलेका छन्। जनकपुरको ‘रामानन्द चोक’मा राउतले भाषण गर्दै गर्दा प्रहरी भने मूकदर्शक बनेको छ। मंगलबार साँझसम्म राउतको खोजी भइरहेको बताएको जनकपुर प्रहरी उनले मुख्य चोकमा उपस्थित हुँदा गर्दा मूकदर्शक बनेको हो।

संविधान दिवसकै दिन स्वतन्त्र मधेसको माग गर्दै विभिन्न कार्यक्रम गर्दै आएका राउतले प्रदेश २ को राजधानी जनकपुरकै मुख्य चोकमा संविधानको चर्को विरोध गर्दै भाषण गरेका हुन्। सिके राउतले जनकपुरमा भाषण गर्दा उता रुपन्देहीको गैडहवामा आमसभा भएको छ। राउत नेतृत्वको स्वतन्त्र मधेश संगठनले आफ्ना कार्यकर्ता राममनोहर यादवको श्रद्धाञ्जलि कार्यक्रमसहित कालो संविधान भन्दै विरोध सभा गरेको हो।

आज संविधान जारी भएको तेस्रो वर्ष पुग्दा मधेसमा सिके राउतका कार्यकर्ताहरुले  विशाल प्रदर्शन गरेका छन् । राउत मात्रै मधेसका यस्ता नेता हुन् जो मधेसलाई अलग देश बनाउने अभियानमा खुला रुपमा उत्रिएका छन् ।
सत्ताको डाडु-पन्यु आफ्नाे हातमा भएका नेताहरुले मधेसलाई अधिकार दिन नमानिरहेका बेला त्यसले राउत र उनका कार्यकर्ताहरुलाई बल पुगेको छ ।

आज मधेसमा कालो दिवस मनाइरहेका बेला राउतका कार्यकर्ताहरुले भने जनकपुरमा मधेस अलग देशको माग गर्दै विशाल प्रदर्शन गरे । मधेसको मुद्दाप्रति सरकार जति असहिष्णु बन्छ राउतलाई त्यति नै बल पुग्नेछ ।

 तस्बिरहरुः पुरन गुप्ता