महोत्तरी , जेठ १८ गते ।
महोत्तरीको बर्दिवास स्थित एक निजि अस्पतालले पाठेघरमा क्यान्सरको खतरा रहेको भन्दै झुक्याएर एक महिलाको पाठेघर काटेर फालिदिएको छ । महोत्तरीको बर्दिवास स्थित एक निजि अस्पतालले झुक्याएर महिलाको पाठेघर शल्यक्रिया गरेर निकालिदिएपछी उक्त घटना बाहिर आएको हो ।
बर्दिवास नगरपालिका स्थित डि.एन.बी मेडीकेयर सेन्टर प्रा.लि.ले सन्धुली कमलामाई नगरपालिका १० भिमान निवासी २९ बर्षिय तोपकुमारी खड्काको पाठेघर बिनाकारण रोग देखाई झुक्याएर शल्यक्रिया गरी निकालिदिएको आफन्तले बताएका छन् । घटना जेष्ठ १५ गते भएपनि बिरामीका आफन्त कानुनी उपचार खोज्दै ईलाका प्रहरी कार्यालय बर्दिवास पुगेपछि घटना सार्वजनिक भएको हो । पाठेघरबाट सामान्य रक्तस्राव हुनु थालेपछि उपचार गर्न आफूहरु उक्त हस्पिटल पुगेको पिडित महिलाका श्रीमान शेषबहादुर खड्काले बताए ।
उक्त मेडीकेयरमा संचालन भैरहेको स्वास्थ्य शिविरमा जाँच गराउँदा २९ बर्सिय खड्काको पाठेघरमा क्यान्सर भएको र ननिकाले ज्यानै जान सक्ने भन्दै शल्यक्रिया गरेको शेषबहादुर खड्काले बताए । उक्त हस्पिटलका चिकित्सकले मेडिकल रिपोर्ट वा कुनै परीक्षण बिना क्यान्सर भन्दै झुक्याएर अप्रेसन गरेको आरोप पीडित महिलाको आफन्तको छ । महिलाका आफन्तका अनुसार अस्पतालका डाक्टरले त्यही दिन भर्ना गरेर त्यही दिन पाठेघर निकालिदिए । बिगत केही दिन देखि पाठेघरबाट सामान्य रक्तस्राव भैरहेको भन्दै ती महिला उपचारको लागि उक्त हस्पिटल पुगेकी थिइन् ।
पीडित महिलाका आफन्तहरुले अपरेसनमा सङग्लन चिकित्सकको नाम दिन पटक पटक आग्रह गर्दा समेत आनाकानी गरेपछी बिनाकारण पाठेघर निकालेर फालेको घटना सार्वजनिक भएको हो । घटना लगतै महिलाका आफन्तले ईलाका प्रहरी कार्यालय बर्दिवास र बर्दिवास नगरपालिकामा लिखित उजुरी दर्ता गराएपछी घटना सतहमा आएको हो । बिना दर्ता रहेको भारतीय चिकित्सकले आफ्नो श्रीमतिको पाठेघर निकालेर फ्याकेको र आफूहरुले सोधीखोजी गर्न थालेपछी मेडिकेयरले चिकित्सक भगाएको पिडीत पक्षको आरोप छ । उक्त महिलाको स्वास्थ्य अवस्था सामान्य रहेको छ ।
घटनाको सम्बन्धमा बर्दिवास नगरपालिकाको न्यायिक समितीले छानबिन सुरु गरेको छ । स्वास्थ्य संस्था स्थापना संञ्चालन तथा स्तरोन्नती मापदण्ड सम्बन्धी निर्दे्शिका अनुसार उक्त मेडिकेयरले मापदण्ड अनुसार कुनै प्रकारको शल्यक्रिया गर्न नपाउने उल्लेख छ । नियम मिचेर उक्त मेडिकेयरले महिलाको पाठेघर निकालिदिएको हो । यसबैबीच उक्त मेडिकेयरको मापदण्ड बिपरीत रहेको र घटनाको सम्बन्धमा बर्दिवास नगरपालिकाले छानविन अगाडी बढाएको छ । पाठेघरको उपचार गर्दा दबाबमा परेर वा कमाउने भन्दै निजी स्वास्थ्य संस्थाहरुले पाठेघरको अनावश्यक शल्यक्रिया गर्ने गरेका छन् । चिकित्सकको लापरवाहीले घट्ना घटेको आरोप लगाउँदै घटनाको छानविन गरी दोषिमाथी कारवाही हुनुपर्ने पिडीत महिलाका श्रीमानले बताए ।-शिस