जनकपुरधाम, जेठ १३ गते ।
प्रदेश सरकारले मुलुकमा गणतन्त्र स्थापना भएको दिन अर्थात गणतन्त्र दिवस भव्यताका साथ मनाउने निर्णय गरेको छ । आज विहान बसेको मन्त्री परिषदको बैठकले गणतन्त्र दिवसलाई भव्यता प्रदान गर्न मुख्यमन्त्री लालबाबु राउतको संयोजकत्वमा २१ सदस्यीय मुल समारोह समिति गठन गरेको छ ।
मुख्यमन्त्री राउतको संयोजकत्वमा गठित समितिमा मन्त्रीहरु, राज्यमन्त्रीहरु, प्रदेश प्रमुख सचिव सहितका सचिवहरु, नेपाली सेनाका उपरथी र नेपाल प्रहरीका डिआइजी रहेका छन ।
दिवसको अवसरमा जेठ १४ गते विहान ६ः३० बजे जानकी मन्दिरमा सरसफाई गर्ने र त्यसको समायोजन समाजिक विकास मन्त्रालयले गर्ने निर्णय गरेको छ । त्यसै गरि जेठ १५ गते विहान प्रभात फेरी गर्ने निर्णय समेत गरेको छ । विहान जानकी मन्दिरबाट शुरु हुने प्रभातफेरी रामानन्द चौक, पिडारी चौक हुँदै जचुकाली परिसर स्थित कवर्ड हलमा सभामा परिणत हुने छ । प्रभातफेरीमा सबै कर्मचारीहरु सहभागी गराउनुका साथै कार्यक्रमको समायोजन गर्ने जिम्मा आन्तरिक मामिला तथा कानून मन्त्रालयलाई दिइएको छ ।
कवर्डहलमा हुने सभामा राष्ट्रगान सहितको कार्यक्रमा राखिएको निमित्त प्रमुख सचिव हरि प्रसाद फुयालले जनाएका छन ।-शिस
