काठमाडौँ, १ चैत ।
नेपाल विद्युत प्राधिकरणका कार्यकारी निर्देशक कुलमान घिसिङ सीईओ अफ दि इयर घोषित भएका छन । पद्मा मिडिया ग्रुपअन्तर्गतको विजनेस प्लस टेलिभिजनले गरेको सीईओ समिट तथा अवार्ड कार्यक्रममा विद्युत प्राधिकरणका कार्यकारी निर्देशक घिसिङ सीईओ अफ दि इयर घोषित भएका हुन । घिसिङले विभिन्न तीन विधामा अवार्ड हात पारे । काठमाडौंमा विशेष समारोहकाबीच नेकपा माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहाल र पद्मा मिडिया ग्रुपका अध्यक्ष राजुप्रसाद कँडेलले घिसिङलाई अवार्ड प्रदान गरे ।
प्राधिकरणका कार्यकारी निर्देशक घिसिङले अवार्डले थप हौसला मिलेको भन्दै आगामी दिनमा नेपाललाई विद्युतमा आत्मनिर्भर बनाउने गरी काम गर्ने बताए । वुमन सिइओ अफ दि इयरको अवार्ड द्वारिका होटलकी सञ्चालिका अम्बिका श्रेष्ठले पाइन भने योङ सिइओ अफ दि इयरको उपाधि अस्कर अलीले पाए । विभिन्न आठ विधाका अवार्ड विजेताहरुलाई उद्योग वाणिज्य तथा आपूर्तिमन्त्री मात्रिका यादव, नेपाली कांग्रेसका महामन्त्री डाक्टर शशांक कोइराला, माओवादी केन्द्रकी प्रवक्ता पम्फा भुसाल लगायतले अवार्ड गिरन ।
कार्यक्रममा माओवादी केन्द्रका अध्यक्ष पुष्पकमल दाहालले मुलुकको आर्थिक विकासका लागि सबै मिलेर काम गर्नुपर्नेमा जोड दिए । उनले राजनीतिक उपलब्धि हासिल भएकाले अब आर्थिक विकासमा ध्यान केन्द्रीत गर्नुपर्ने र सबैले एकताबद्ध भएर काम गर्नुपर्ने बताए । बिजनेश प्लस टेलिभिजनको आयोजनामा काठमाडौंमा पहिलो पटक सीईओ सम्मेलन भएको छ । यस सम्मेलनमा नेपालसहित विभिन्न देशका १७ कम्पनीका सीईओहरुको सहभागिता रहेको थियो ।
सिइओ सम्मेलनको उद्घाटन शत्रमा बोल्दै पूर्व प्रधानमन्त्री एवं नयाँ शक्ति नेपालका संयोजक बाबुराम भट्टराईले समृद्ध नेपाल निर्माणका लागि अब मुलकुमा दुई दल मात्रै हुनुपर्नेमा जोड दिएका छन् । भट्टराईले संविधानले नेपाललाई समाजवादतर्फ उन्मुख गराएकाले अब मुलुकमा धेरै राजनीतिक दलको आवश्यकता नरहेको स्पष्ट पारे । उनले अब सबै नागरिक मिलेर देशको आर्थिक समृद्धिमा लाग्नुपर्नेमा जोड दिए ।
भट्टराईले पृथ्वीनारायण शाह, गौतम बुद्व, बिपी कोइराला र पुष्पलाललाई राष्ट्रिय व्यक्तित्व घोषणा गर्न पनि प्रस्ताव गरेका छन् । यसै सम्मेलनमा बोल्दै नेकपा एमालेका नेता रविन्द्र अधिकारीले अब आर्थिक समृद्धिले नै बिकासको ढोका खोल्ने भन्दै अवको नेपाल समृद्व नेपाल हुनुपर्ने बताए ।
सम्मेलनमा नेपाली कांग्रेसका नेता गगनकुमार थापाले समृद्ध नेपाल निर्माणका लागि राजनीतिक प्रतिबद्धता आवश्यक रहेको बताए । उनले दुई तिहाई समर्थन प्राप्त गरेको सरकारले दम्भ रहित ढंगले बिकासका गतिविधि अघि बढाउनुपर्नेमा जोड दिए ।
कार्यक्रममा पद्मा मिडिया प्रालि तथा बिजनेस प्लस टेलिभिजनका अध्यक्ष राजुप्रसाद कंडेलले स्वदेशी उत्पादनले बजार नपाएको अवस्थामा बिदेशबाट मालसामानहरु आयात भइरहेकोले नेपाली उत्पादनले सहज रुपमा बजार पाउनु पर्ने अवस्था सिर्जना हुनु पर्नेमा जोड दिए ।
