काठमाडौ, २४ फागुन ।
वाम गठबन्धनले प्रतिनिधिसभाको सभामुखमा माओवादी केन्द्रकातर्फबाट कृष्ण बहादुर महरालाई पठाउने तयारी गरेको छ । वाम गठबन्धनले शुक्रबार गरेको कुराकानीका आधारमा उम्मेदवारी दिने समयसम्म नबदलिए महरा नै सभामुख बन्ने करिव करिव पक्का भएको छ ।
सभामुख चयनका लागि शुक्रबार सूचना दर्ता र शनिबार प्रतिनिधिसभा बैठकमा निर्वाचन गर्ने कार्यक्रम छ ।
सभामुखमा एमालेका तर्फबाट पूर्वसभामुख सुवास नेम्वाङले पनि दाबी गरेका छन् भने यसअघि दुइटा संविधानसभाको अध्यक्षको रूपमा नेतृत्व गरिसकेकाले अनुभवका अाधारमा पनि प्रतिनिधिसभालाई प्रभावकारी बनाउन उनकाे भूमिका बलियाे हुने एमालेकाे दावी छ । तर, वामएकतापछि मुख्य पदहरू बाँडफाँट गर्दा सभामुख आफूले पाउनुपर्ने अडान माओवादी केन्द्रकाे छ ।
माओवादीका अध्यक्ष पुष्पकमल दाहाल प्रचण्ड, नेताहरु नारायणकाजी श्रेष्ठ र गृहमन्त्री समेत रहेका रामबहादुर थापाले भोली बिहान सम्ममा यस विषयमा अन्तिम निर्णय लिने बताइएको छ ।
सभामुखका लागि माओवादीबाट कृष्णबहादुर महराले रुची देखाएपनि बाहिर देखिने गरि लबिङ भने गरेका छैनन् । राष्ट्रपति, उपराष्ट्रपतिसँगै सभामुख पदमा समेत ओनसरी घर्तीलाई दोहोर्याउने बताईएपनि सफल कार्यकाल पुरा गरेकी घर्तीले आफु सभामुख पदको आकांक्षी नरहेको बताएकी छन् ।
महरासँगै माओवादीमा नेता, देब गुरुङ, अग्नी सापकोटा, हरिबोल गजुरेल, पम्फा भुषाल, लेखराज भट्ट लगायतको सभामुख पदका लागि चर्चा भएको थियो । अर्का नेता गिरिराजमणी पोखरेलको समेत सभामुखमा चर्चा भएपनि उनी शिक्षा मन्त्रालय पाउने भएपछि सरकारमा जाने भएका छन् । पोखरेलकै लागि भनेर एमालेको भागमा परेको शिक्षा मन्त्रालय नेता नारायणकाजी श्रेष्ठले माओवादीमै फिर्ता ल्याएका छन् ।
