काठमाडौं, २३ फागुन ।
नेपाली व्यवसायी विनोध चौधरी विश्वको १५ सय ६१ औं धनी बनेका छन् । अमेरिकी फोब्र्स पत्रिकाले निकालेको विश्वका २ हजार २ सय ८ अर्बपतिहरुको सूचीमा चौधरी १५ सय ६१ औं स्थानमा परेका हुन् । गत साल उनी धनाढ्य सूचीको १५ सय ६७ औं स्थानमा थिए ।
उनी अहिले ६ स्थान अगाडी परेका हुन् । फोब्र्स अनुसार चौधरीको कूल सम्पत्ति १ अर्ब ५३ करोड अमेरिकी डलर अर्थात् आजको अमेरिकी डलरको मूल्य अनुसार १ खर्ब ५८ अर्ब ५६ करोड ९२ लाख रुपैयाँ छ । नेपाल राष्ट्र बैंकले आजका लागि अमेरिकी डलरको खरीद मूल्य १ सय ३ रुपैयाँ ६४ पैसा तोकेको छ । गत साल उनको सम्पत्ति १ अर्ब ३० करोड अमेरिकी डलर थियो । एक वर्षको अबधीमा उनले २३ करोड अमेरिकी डलर अर्थात् २ अर्ब ३८ करोड रुपैयाँ बढी कमाएका छन् ।
चौधरी सन् २०१३ देखि अमेरिकी पत्रिका फोब्र्सको अर्बपति सूचीमा परेका हुन् । चौधरीले अटोबोमाइल, बायोटेक र आयुर्वेद, सिमेन्ट, शिक्षा, विद्युतीय सान, वित्तीय क्षेत्र, स्वास्थ्य, टेलिकम लगायत व्यवसायिक क्षेत्रमा कारोबार गर्दै आएका चौधरीले, गत साल मात्रै सरकारलाई ८ अर्ब रुपैयाँ कर बुुझाएका थिए ।
विनोध चौधरी ग्रप अफ इन्डस्ट्रीजका मालिक हुन् । १९९० सालको भूकम्प गएको २ वर्षपछि चौधरी परिवारले हालको विशाल बजारअगाडी न्युरोडमा वार्षिक २०० रूपैयाँ भाडामा लिएर पसल खोलेको थियो । हाल सीजीभित्रै झन्डै ४० कम्पनी छन् । अघिल्लो संबिधानसभामा एमालेबाट सभाषद बनेका चौधरी, यसपाली काँग्रेसको तर्फबाट सांसद बनेका छन् ।
यो वर्ष फोब्र्सको धनाढ्य सूचीमा २ हजार २ सय ८ जना अटाएका छन् । तीमध्ये १ सय १२ अर्ब अमेरिकी डलरको सम्पत्ति सहित अमेजनका मालिक जेफ बेजोस विश्वकै सबभन्दा धनी बनेका छन् । उनको सम्पत्ति नेपालका सबभन्दा धनी विनोध चौधरीको भन्दा, १ सय १० अर्ब ५० करोड अमेरिकी डलर भन्दा बढी हो । दोश्रो धनी बिल गेट्सको ९० अर्ब र तेश्रो धनी वारेन बफेटको ८४ अर्ब अमेरिकी डलर सम्पत्ति छ ।
